«Қазгидромет» РМК Атырау облыстық филиалының гидрологиялық мониторинг дерегіне сүйенсек, Жайық өзенінің деңгейі күн сайын көтеріліп келеді. Жексенбіде Индер және Махамбет ауданында қауіпті шектен асып кетті. Мәселен, Индер ауданында 6 мамырда күндізгі сағат 12.00-де Индербор кентінің тұсында өзен арнасының суы 887 см-ге жетті. Мұнда қауіпті шек – 845 см. Демек су қауіпті шектен +42 см-ге көбейіп тұр. Ал Махамбет ауданында өзен арнасы қауіпті деңгейден +13 см-ге асты. Дәл сол уақытта Махамбет аулының тұсындағы су деңгейі 863 см болды. Өзен арнасындағы су деңгейі қауіпті шектен асса жағдай қиындай ма? Бұл маңызды сұрақ барлық атыраулықтарды алаңдатып отыр. Өйткені Жайық өзенінің бойында «Индер» мен «Махамбет» аудандарының ауылдары, Атырау қаласы мен оның маңындағы бірнеше елді мекен орналасқан. «Индербор» кенті мен 6 округтегі 11 елді мекенде 33 мыңға жуық тұрғын тіркелген. Оның ішінде 15 мектепте оқитын 6 407 оқушы бар. Бұл ауданда «Жарсуат» және «Құрылыс» ауылдары су басу қаупі басым аумақта тұр. «Жарсуатта» – 2 200, Құрылыс елді мекенінде 700 адам тұрады. Бұл округ үшін эвакуациялық пункт ретінде «Индербор» кенті белгіленді. Қазір ауданда 15 эвакуациялық пункт ашылып, 1600 орын дайындалды. Тұрғындарды көшіру қажеттілігі туындаған жағдайда эвакуациялау жұмыстарына 150-ге жуық қызметкер жұмылады. Тұрғындарды тасымалдауға 20-дан аса техника дайын тұр. Су басу қаупі туындаса, дабыл белгісі іске қосылады. Бұл аудандағы эвакуация пунктінің бірі «Индербор» кентіндегі М.Әуезов атындағы орта мектепте орналасқан. Қазір мұнда 45 кереует, 45 әскери төсек-жабдық алынып, спорт залда 90 орын әзірленген. Білім ордасындағы асханадан бір мезгілде 100 адам тамақтана алады.